【專文】名不正言不順
詳細看、聽了國民黨不分區立委翁曉玲12月25在立法院質詢總統府秘書長潘孟安的對話錄影，感觸足深。
先講我的感想，我足希望賴清德嘛認真看這段錄影，希望伊會感覺伊有民族責任，將台灣和目前這個假中華民國的關係，對台灣社會老實講予清楚，千萬呣通肖想台灣人攏會願意，隨民進黨欺騙家己和騙台灣社會講：「中華民國著是台灣」、「台灣是主權獨立的國家」。
網路上足濟較倚民進黨或反國民黨的網友，大量流傳翁曉玲講：「中共收復台灣有什麼不對！」這寡網友呣知是無心或有意，將伊的話蓋掉頭前句，通若像足有理罵較大聲。
事實上，伊歸句話是：「如果你們承認中華人民共和國的主權範圍涵蓋台灣地區的話，那它收復台灣有什麼不對？」嚴格講起來，翁曉玲這句話是完全正確合理的。
若要反駁翁曉玲，咁哪有2點：第1.潘孟安並無講出或承認「中華人民共和國的主權範圍涵蓋台灣地區」嘿是翁曉玲家己結論提來做前提的；第2.就國際法理「中國並無擁有台灣主權」所以，公認唯一合法代表中國的「中華人民共和國」政權，主權範圍當然無涵蓋台灣地區；所以，翁曉玲是在講廢話！
潘孟安在和翁曉玲的對答，坦白講是陷在政治立場上名不正言不順的困難，伊硬要諍講「中華民國就是台灣」，卻閃祙過翁曉玲指出的，中華民國憲法上的領土包括海峽對岸的中國和蒙古，安呢，中華民國安怎會等於台灣？
面對翁曉玲逼問：「中華人民共和國簡稱中國，中華民國的簡稱不也是中國嗎？」潘孟安根本呣敢應。
賴清德團隊若是繼續要用「中華民國著是台灣」來瞞天過海，是在舉鋤頭掘家己的腳，因為，既然憲法上的領土超過99%是予中共和蒙古佔去，安呢的「中華民國台灣」哪可能是一個所謂「主權獨立的國家」！
台灣人無可能遐無知識閣無常識來信這種「民進黨神話」，民進黨領導層若肖想玩弄「豬著是鹿(deer)、鹿著是狗(dog)」來混亂台灣人對事實的認知，冷靜理性的台灣人是無可能予怹騙過手的，民進黨呣通錯估怹已經在台獨支持者流失的選票。
民進黨若要有前途，誠心建議賴清德呼籲大家做正正堂堂有民族尊嚴的台灣人，先對家己本身做起，老老實實向台灣社會講清楚：
台灣著是台灣，中華民國早在1949著被中共推翻消滅，目前強搭在台灣的所謂「中華民國」，是外來勢力藉軍武暴力建構來壓迫、剝削咱台灣人的民族壓迫體制，無合法性閣無正當性，經過逐濟台灣民族志士流血流汗甚至犧牲性命的抗爭，咱今已經拍破外來勢力的獨裁壟斷，咱的未來著是要團結台灣民族，建立一個名正言順新閣獨立的國家。
專文屬作者意見，文責歸屬作者，不代表本報立場。
